2Ki 6 | ZomZIV | STEP | Kamsang honte in Elisha kiangah, “En in, nang tawh i kituahna mun ko adingin neu lua hi.

2 Kings 6

Heitang Khat Laam

1 Kamsang honte in Elisha kiangah, “En in, nang tawh i kituahna mun ko adingin neu lua hi. 2 Jordan ah pai-in, tua lai-ah khuam khat ciat ka va sat ding uh a i om nading khat ka lam ding uh hi,” a ci uh hi. ^a

Tuateh amah in, “Pai un,” ci hi.

3 Tua ciangin amaute khat in, “Hehpihna-in na nasemte nong zui daim?” a ci hi.

Elisha in, “Kong zui ding hi,” ci-in dawnga 4 amaute a zui hi.

Amaute Jordan ah paisuk uh a, sing a phuk uh hi. 5 Amaute khat in sing a phuk laitakin a heitang tui sungah a kiasak hi. Amah in, “O, ka topa, a kikawm hiven!” ci-in a awng hi.

6 Pasian mipa in, “Koi lai-ah kia a hia?” ci-in a dong hi. A tukna mun tak a lah ciangin Elisha in ciang khat sat-a, tua lai-ah lawnin sik a laamsak hi. 7 Amah in, “Kilaam khia in,” a ci hi. Tua ciangin mipa in zamin a tawm hi. ^b

Elisha in Aram-te’ Mittawsakin Man

8 Tu-in Aram kumpipa in Israel a do hi. A uliante tawh a kikup khit ciangin amah in, “Tua mun tua munah ka giahphual ka sat ding hi,” a ci hi.

9 Pasian mipa in Israel kumpipa kiangah, “Aram-te tua lai-ah paisuk ahi manin tua mun na nawk khak ding kidawm in,” ci-in thu a khak hi. 10 Tua ciangin Israel kumpipa in Pasian mipa genna munteng a encian hi. Kumpipa tua munte ah a kigalgin nadingin Elisha in a vauhilh zelzel hi. ^c

11 Hih in Aram kumpipa a lungsosak hi. Amah in a uliante khawm a, “Ei sunga Israel kumpipa lama pang pen hong gen lo ding na hi uh hiam?” ci-in a kal hi.

12 A uliante khat in, “Ka topa kumpipa aw, kote khat beek ka hi kei uh hi. Israel sunga kamsangpa Elisha in Israel kumpipa kiangah na lupna inndei sunga na gen tektek a gen hi,” a ci hi.

13 Kumpipa in, “Mi sawla amah ka mat theih nadingin a omna va mukhia un,” ci-in thu a pia hi. “Amah Dothan ah om hi,” ci-in thu kipuak kik hi. 14 Tua ciangin sakolte le sakollengte le a thahat galkapte tua lai-ah a sawl hi. Amaute zan in kuan uh a khuapi a umcih uh hi.

15 A zing ciang zingsang tung Pasian mipa’ nasempa tho-in a pusuahkhiat ciangin sakolte le sakollengte tawh khuapi a na kiumcih hi. Nasempa in, “Ka topa aw, bangcih ding i hi hiam?’ ci-in a dong hi.

16 Kamsangpa in, “Lau kei in, amaute a ompihte sangin ei hong ompihte tamzaw uh hi,” ci-in a dawng hi. ^d

17 Tuateh Elisha in, “TOPA aw, a muh theih nadingin a mit honsak in,” ci-in thu a ngen hi. Tua ciangin TOPA in a nasempa mit honsak a, Elisha kimkot-a mualte khempeuh ah sakolte le meikuang sakollengte a dima om a mu hi. ^e

18 Ama kiangah galte a paisuk ciangin Elisha in TOPA kiangah, “Hih mite mittawtna tawh sat in,” ci-in thu a ngen hi. Tua ciangin Elisha nget bangin mittawtna tawh amaute a sat hi.

19 Elisha in amaute kiangah, “Hih in lampi hi loin khuapi zong ahi kei hi. Kei hong zui un no zon mipa kiangah kong pi ding hi,” ci-in a gen hi. Tua ciangin amah in amaute Samaria ah a paipih hi.

20 Amaute khuapi sung a lut khit uh ciangin Elisha in, “TOPA, hih mite in khua a muh theih nadingun a mit uh honsak in,” a ci hi. Tua ciangin TOPA in amaute mit honsaka, a khuadak uh leh amaute Samaria sunga om ahi uh hi.

21 Israel kumpipa in amaute a muh ciangin Elisha kiangah, “Amaute ka that ding hiam, ka pa aw? Amaute ka that ding hiam?” ci-in a dong hi.

22 Amah in, “Amaute that kei in, nang in na namsau le na thaltang tawh na matsate that ding na hi hiam? A nek dingun an le tui amaute mai-ah lui inla tua ciangin a pu uh kiangah ciah kik uh hen,” ci-in a dawng hi. 23 Tua ciangin amaute ading pawi lianpi bawlsaka, a ne a dawn khit uh ciangin amaute khakhia-in, a pu uh kiangah a ciah kik uh hi. Tua ciangin Aram pana galkap honte in Israel gam sim ding a tawp uh hi. ^f

Samaria Ki-umcihin Kialpi tung

24 Tua nung hun khat ciangin Aram kumpipa Ben-Hadad in a galkap khempeuh khawma, kuantosakin Samaria a umcihsak hi. 25 Khuapi sungah kialpi nasiatakin a tung hi; a umcih sung uh sawt lua ahi manin laa lutang khat ngun shekel sawmgiat ^{▼▼6.25 Tua in, pound 2 bang (kilogram 1 bang)} in kizuak-a, khaici-hol ^{▼▼6.25 Ahikeh kawlvakhu ek} cab ^{▼▼6.25 Tua in pint ½ bang (litre 0.3 bang)} khat sehli suah sehkhat ciangin shekel nga ^{▼▼6.25 Tua in ounce 2 bang (gram 35 bang)} in a zuak uh hi. ^k

26 Israel kumpipa kulh tungah a vak laitakin nupi khat in, “Ka topa kumpipa aw, hong huh in!” ci-in a kiko hi.

27 Kumpipa in, “TOPA in hong huh kei ngal leh nang kong huh nading koi pan ngah ding ka hi hiam, ancilna phual pan maw? Lengtui sukna phual pan maw?” ci-in a dawng hi. 28 Tua ciangin tuanu kiangah, “Bang thu ahi hiam?” ci-in a dong hi.

Tuanu in, “Hih nu in, ‘Tuni-a i nek ding na tapa hong pia in, zing ciangin kei tapa i ne ding hi,’ hong ci hi. 29 Tua ciangin kei tapa huanin ka ne uh hi. A zing ciangin tuanu kiangah, “Na tapa i nek dingin hong pia in,” ka cih hangin selmang hi,” ci-in a dawng hi.

30 Kumpipa in nupinu thugente a zak ciangin a puante a balkek hi. Amah kulh tung zui-in a paipai mite in a en uh hi; amah in a pumpi tungah puan sungsilhin ippi bek a silh hi. ^l 31 Amah in, “Tuni-in Shaphat tapa Elisha lutang le a liangko a kithuah lai tak leh Pasian in kei a nasia zaw in hong thuk ta hen!” a ci hi. ^m

32 Tua hunin Elisha a inn sungah tu a, upate amah tawh a tut khawm laitak uh ahi hi. Kumpipa in kamtai ma paisak a, ahi hangin ama tun ma-in Elisha in upate kiangah, “Hih mithatpa in ka ngawng tan dingin mi hong sawl mu lo na hi uh hiam? Ngai un, kamtaipa hong tun ciangin kong khak unla limtakin lencip un. Ama nungah a pu’ khe ging hi lo ahi hiam?” a ci hi.

33 Amaute kiangah a gengen laitakin kamtaipa ama kiang a tung suk ta hi. Tuateh kumpipa in, “Hih siatna TOPA kiang pan ahi hi. Bang hangin TOPA ngakngak lai ding ka hi hiam?” a ci hi. ⁿ